مقالات القراء | نهى مشهور تكتب : ده مخالف…… دش إزاز عربيته!!!

حملة عقلي الباطن هيموت و يقودها
يعني مش واقعية رغم اني بفكر جديا يوم بعد يوم اني أنفذ الحملة دي
لاني بصراحة زهقت و اتخنقت زي أغلب أو كل الناس هنا
عبارة عن كيس مليان شوية حصى و طوب و زلط
عادي صغنن كده و مش هنرمي بيه ابليس
هوريكو هنرمي بيه مين

فين النظام
بجد اللي يلاقية يمسك فيه
الناس بقت بتستمتع بخرق القوانين بيححبو يشمو مخالف
زي خالف تعرف كده لييييييه؟؟؟
يعني مثلا في ميدان القومية
ايه يحصل لما نقف في الاشارة زي كل الناس المحترمة
زي ما كان العسكري الواحد ده بيقدر يوقف الاشارة و يمشيها و الظابط قاعد في الضلة على الكرسي الل جوة العمارة اللي بقالها كتير بتتبني دي
او في العربية بتاعته عادي
العسكري مكنش بيتعب
لان الناس تشوف الاشارة بقت لونها أحمر تقف و لما تفتح يترحكو
عادي
اقل امكانيات العقل البشري في التمييز
دلوقتي لو وقفت لما الاشارة تقفل بينهال سيل من الكلاكسات اللي من اصواتها تحس انها ممكن تترجم شتيمة
علشان وقفنا في الاشارة
و الكلام ده اغلبه لسواقين التاكسي
مش كلهم بس اغلبهم بيعمل كده
يعني لما اكون ماشية على الصحراوي و طالعه على العاشر من رمضان
طريق سريع اهو
بنتكلم في سرعة من 100 على اقل تقدير
و انت طالع بقى
و يا سلام لما فجأة و انت ماشي فاتح وواخد راحتك تلاقي كارو جايلك مخالف و السواق مبتسم و فرحان قوي
و الانيل لما مشيت شوية كمان لقيت في وشي عربية نقل كبيرة تريللا يعني
اه و الله و في وشي كده
و انا كنت 140 و الاخر الاسطى مش عاجبه و بيضرب النفير الرائع للتريلا
لولا ستر ربنا شمالي كان فاضي خدته
احساس غريب و يفجر براكين عصبية و غضب
طب حط الاحساس ده على جمب
و بمناسبة الصوت القوي بتاع التريلا ده مين كده الصوت ده قرفة في عز النوم
ممكن يكون الفجر او الساعه 2 بليل كده مثلا عادي
يعني الدنيا فاضية بس هو حابب يسمعنا الصوت بتاعه قد ايه عالي
ولا في القيلولة و انت راجع من شغلك هلكان و تسمع الصوت الرائع ده في المرحلة اللي خلاص بتروح في النوم
طب الاحساس ده على جمب
مرة في يوم كنت جوة القومية و عادي الاشارة قفلت فوقفت عند ماكس كده
و حتى كان في واحد معدي من الشباب اللي معلين الكاسيت جايب لحد الجامعه و معدي من جمبي
بصراحة لسوء ظني افتكرته هيكسرها عادي يعني ده اذا كان شافها
بصراحة الشاب طلع محترم لما اكتشف انها قافلة و انه هيكسرها
فرمل و رجع شوية لورا
و اذ فجاة عادي يعني تاكسي جه وقف ورايا
و عمال يضرب كلاكسات بغباء و باستفزاز
انا شكيت يكون كاوتشي نام مثلا او حصل مصيبة انا مشوفتهاش
و هوب طلع راسة من الشباك و هاتك يا سيل شتيمة
لييييييييه؟؟؟؟
علشان انا واقفة في الاشارة طبعا انا تنحت و مردتش بس كنت هموت و ارد لكن للاسف معنديش كلام ارد بيه
و معدي الطريق واحد كده معرفوش و لقيته بعد ما عدى رجع تاني لسواق التاكسي رد ليه كل الشتيمة اللي انا مش هقدر اقولها و بستفة
طيب اليوم يعدي كده ابدااااا
عند الجامعة واحده ست كده معاها طفلين واحد على كتفها و التاني بيدبدب في الارض و بزين زي العيال الغلسة عايز حاجه شكله
و البست عايزة تعدي الطريق و خايفة و متردده المهم من بعيد هديت كده و شاورت ليها تعدي و الست عماله تجر في العيل الغلس اللي هي مخلفاه ده و من ورايا جه سواق تاكسي تاني خالص خالص و انتو عارفين طريق الجامعة فاضي وواسع يعني
و ده وقف ورايا و من نفس الشباك طلع راسه و طك طك طك نفس القصيده تقريبا و تلقيح علشان مهدية
ساعتها الدم فار بقى هو انا هفضل اتشتم كده
لا لازم ارد و اخد حقي … بس لو نزلت هقولو ايه الله يسامح بابا و ماما ربونا بزياده المهم خلاص بفتح الباب و نازلة بقى و زي ما تيجي لقيت الظابط اللي قاعد جمب الدبابات هناك ده ايام ما كانت دبابات
قام من بين الدبابتين و اخد نفس الموقف و ظبط السواق و السواق بيعتذر للظابط راح قايله مش ليا يا ***** اعتذر ليها انت لو شفت هي وقفت ليه تحترم نفسك
احساسكو ايه لما اليوم كله شتيمة شتيمة علشان ماشية عدل
طب اركنو الاحساس ده على جمب
منياالقمح و حدث بلا حرج عن التكاتك و جمالها
صراصير ماشية
و في اي اتجاه
يمين شمال فوق تحت عادي زي دراع البلاي ستيشن كده
و هو بتاع صغير كده و مطلع صوت ايييه و اغاني اعجب من العجب
المهم قدام بيتنا الشارع الرئيسي الوحيد في منياالقمح تقريبا و الله طريق كبير
عرض 8 عربيات كده مرتاح يعني مش صغير
بس الجدع و بكررها الجدع اللي كان لاقي حارة واحده يمشي فيها في الاتجاه الاصلي
هو اساسا شارع اتجاه واحد
بس شارع مجهول الملامح حاليا لان اي حد ممكن يروح اي حتة و في اي وقت و اللي ماشي صح يخبط راسه في الحيط
فاكرين كيس الطوب و الحصى
انا بقى بعد كل الاحاسيس اللي ركنتها فوق دي بفكر اجيب كيس و احطه جمبي
اي حد يجيلي مخالف ارميه بطوبة مش فيه هو لا في ازاز العربية بتاعته
يتدش
لان عربية واحده مخالف ممكن توقف اجدع و اكبر طريق و انتو اكيد مجربين و عارفين
من هناابتدت الحملة في دماغي
هناشد كل واحد وواحده محروق دمهم من قلة الادب و استغلال عدم وجود مرور و حبهم للروح الهمجية دي يتعاونو معايا
و نعمل حملة
” ده مخالف دش ازاز عربيته”
يقوم كل واحد بعد كده يتعلم الادب و النظام علشان خايف على عربيته مش علشان لا قدر الله محترم
*ملحوظة
علشان نخفف الاحساسيس البغيضة دي كلها
لو عربيتم مكيفة كده قطعت نص الطريق اقفل الازاز و شغل المكيف و يا تشغل اذاعة القران الكريم
و ممكن تشغل شوي اغاني من اللي بتنضف الودان زي مثلا عبد الحليم و ام كلثوم و عبد الوهاب او تسمع موسيقى هادية علشان تخفف عصبيتك و تعزلك عن العالم بس بلاش الموسيقى الهادية بليل لتنامو و انتو سايقين بجد و بتحصل و الله ممكن نسمع بلاي ليست كده لعمر خيرت و اهو نصفي البال و ننضف الودان و ننسى السيرك من حولينا
و لحين اشعار اخر خلو الحملة دي جوة العقل الباطن بس

نهى مشهور

تابع الشرقية توداي على جوجل نيوز