تهمة الخيانة عارفين حكمها
التقصير ماشي
الاهمال ميضرش
جزاءات تحويل للتحقيق حبس غرامة اعدام
عادي حاجات معروفة
بس اعرف ايه هي عقوبة الغباء
و مين هيحكم فيها و هيكون ايه الحكم
يعني لما خط الغاز يتفجر للمرة ال 12
هي مصر نوت تدخل موسوعة جينيس و محدش عارف؟
طيب لما كل ده يحصل من نفس المجموعة و بيكلف مصر مبالغ مهولة
و محدش عارف يحمي نفس الانبوب الي بيتفجر بنفس الطريقة في نفس المكان من نفس الناس
بالذمة مش ده غباء؟؟؟؟
سوري في التشبية
الحمار عندنا في الفلاحين لما صاحبه يسيبه اتوماتيك بيرجع البيت لوحده
حافظ طريقة تماما
و الملثم ده كنت فاكراه خارق الذكاء
اكتشفت ان الداخلية عموما مبقتش محتاجة ذكاء
لا خالص
طيب بلاش الغاز
تحبو نتكلم عن ماتشات الكورة
في كام ماتش كورة لحد دلوقتي حصل فيهم مشاكل
نفس المكونات
ماتش
جمهور
خناقة و دم و تكسير
طيب مين كان السبب غير الماجورين
طيب هما فين الماجورين
طيب مين ماجرهم
طيب فين لجان التحقيق
محدش قال مين الي دافع اجرة الموضوع ده ليه؟ مش عارفين و لا عارفين و عاملين مش عارفين ؟
بس الفكرة انه كل ما بيتكرر كل مرة بتكون اغمق من الي قبلها و خسايرها اكتر
لما غلط يتكرر بالعدد ده من المرات بنفس الاسلوب و محدش بيتعلم و يتفادى الغلط
او على الاقل يلغي السبب
يعني مش قادر احمي و أأمن ماتشات
الغيها و افصل بكرامتي و اصون الفلوس و الدم
و ابطل بهدلة في الظباط و العساكر الي بيشيلو دايما نتيجة اخطاء الأغبياء الكبار الي فوق
لانهم للاسف هما الي بيتعاملو
ده القرد بيتعلم بالتكرار
معقول الجماعه دول معدل ذكائهم محصلش قرد؟؟؟ و ده مش اي تكرار
دي بقت اخر مسخرة بجد الواحد مش عارف يضحك ولا يزعل
بس ده هم يضحك
انا مش هتكلم طبعا عن ان كل التصريحات بتقول ان الداخلية مضربتش بالخرطوش نهائي و لم يتم استخدامة
بس مفيش واحد كلف خاطره يطلع ببيان كامل يقول الخرطوش جاي منين
مفيش صور ادله فيديوهات
خاطبو عقولنا شوية
طيب ده الغباء
عارفين ايه هو قمة الغباء بقى؟؟؟
ان يجي علينا يوم و نديهم الثقة و الأمان تاني و نصدقهم
بس انا قلبي بيقولي ده مش غباء
لالالالا ده استعباط يا جماعة
طلب خاص مني و فكرو فيه
الظابط و العسكري الي اي حد بيتفرد و يعمل فيها اسد و يشتمه و يهينه و هو بيشتغل ملوش ذنب
الي يحب يتكلم عن الداخلية الي كل ما ربنا ينفخ في صورتها تتهز صورتها بفعل الغباااااء ( المتعمد )
فساد الداخلية و غبائها مش من الظابط و العسكري دول
لا ده من الي عامل فيها قائد و قاعد فوق بيلعب بيهم زي عساكر الشطرنج
تطهير الداخلية بيبتدي من فوق من الراس مش من تحت من ظابط و عسكري في الشارع طلعان عينه و الاخر ربنا يوعده بواحد سخيف و بارد يهينه و يجرح فيه
راعو ان منهم ناس ماتت علشان الحق و استشهدو بلاش نقلل من قيمة شغلهم
مش ذنبهم ان وزارتهم غبية و ان مجالهومش وزير فاهم معنى كلمة تطهير الداخليه بجد
و منهم ناس نفسها في كلمة التطهير بجد
خلينا منكونش بغباء الي فوق دول و نركز و منسبش الحمار و نتشطر على البردعة زي ما بنقول عندنا في الفلاحين
انا كنت معجبة بشغل سيادة الوزير الفترة الي فاتت نوعا ما في القاهرة و بعض المحافظات كان امن الشارع بدا يكون قوي فعلا و الراجل اشتغل شغل من نار
لكن على امتداد 3 وزراء نفس الغلطات بتطلع
نفس شغب الماتش و تفجير الانبوب
غير التصريحات
لحد هنا و مقدرش أستحمل الغباء
اخيرا يا ريت نقرأ الفاتحة و ندعو بالرحمة و المغفرة للضحايا
و ربنا يرزقنا حسن الخاتمة
و يحمي مصر من شر الغباء لانه زيه زي الخيانة دلوقتي في النتيجة
بقلم : نهي اسامة مشهور
(( جميع ما ينشر على الموقع من مقالات القراء تعبر عن رأي صاحبها ولا تعبر عن رأي الموقع ))
تابع الشرقية توداي على جوجل نيوز 
