شيئ مثير للعصبية و الغضب لما يكون الموضوع الوحيد المنتشر هو
خلاص الاسلاميين هيمسكوها
هيقفلوها علينا
لالالالالا مش احسن من الليبراليين لما يمسكوها و تكون سايبة
احنا مينفعناش غير الجيش و يمسك العصاية للبلد
هو الي هيعرف يشكم الناس و الي ميعجبوش حلال فيه الرصاص
فين ايامك يا مبارك مكنتش سايب فرصة للناس دي تطلع و تتعب تفكيرنا كده ” دي مش تريقة في فعلا ناس من كتر الحيرة اتمنت ايام مبارك ” و الله جد
طبعا مش هنتكلم عن الكلام الحلو على عينة
يعني الناس كلها هتنام من المغرب و اللبس هيكون شكله ايه و الكلام هيكون عامل ازاي
ولو الاسلاميين و دي تشمل الاخوان و السلفيين
هنتكلم ازاي و هنقول ايه و مش هيكون في ميديا ولا تليفزيون
و البلد هيكون شكلها ايه
طبعا كل الكلام الي اتقال هنا صور البلد على انها وحش مرعب كله سلبيات سلبيات و مفيش ولا نقطة ايجابية واحده
ولو الليبراليين مسكوها
يا حلولي بقى
البلد هتدور على حل شعرها
و الخمور هتكون زي الكولا في المحلات
و هيلغو الرقابة على الميديا و السينيما
و البلد هتدور على حل شعرها
بردو كلها سلبيات سلبيات
لا لو العسكر مسكوها هتبقى خربت
ايوة همااصلا هيكتمو نفسنا و يكملو مسيرة مبارك
هيطلعو علينا ذنب اننا قمنا بالثورة اساسا
هياخدو تار صاحبهم
ايه يا جماعة امتى الناس هتفكر اننا قلعنا طوق العبودية
محدش هيفكر ليك
محدش هيقولك البس و كل و شوف و اخرج و ادخل
هتعرف امتى ان صفتك الانسانية رجعتلك و ان مخك و قلبك هما ملكك انت مش ملك حد انت عبد ليه و اقصد عبد يعني مملكوك علشان محدش يفسرها زي ما يحب
كلنا عبيد لله الخالق فقط
لو الاخوان اصبحو اغلبيه اهلا بيهم و ماله ده كان اختيار الاغلبية
ليه بصينا ليهم على انهم كائنات جايه للفساد و بالنسبة لايجابياتهم الي بيها فقط اكتسحو في النقابات
و بمجهودهم فقط و عملهم
الاسلاميين مهما كان حزبهم هم بشر مش علشان سمناهم اسلاميين بقو انبياء و العياذ بالله
يعني الخطأ موجود عادي يعني زي اي انسان
سيبتو كل ده و مسكنا بس في العيوب فقط؟؟؟
لاننا عايزين نحس اننا دايما ضحايا
و دايما احنا مغلوبين و بمنشي على حسب هوى و شوق صاحب عصاية السلطة
و الليبراليين هيخلوها سايبة
ليه هو حد كلف نفسه اساسا و عرف ايه هي الليبرالية الصح او عل الاقل ايه هدفها او هدف انصارها في مصر؟
ليه ماسكين في العيوب و صعبان علينا حالنا
محدش هيقرر ليك هتعمل ايه انت صاحب قرارك
مش عايز لا دول ولا دول فكر و شوف ايه اكتر اتجاه مناسب لافكارك
كلفو نفسكو و ققرو مصيركم شوية
اخلعو ثوب الضحية الي بقى في ناس مستمتعة بيه و بيصدقو نفسهم
انما انا كنت مصدومة لما بلاقي ناس لما تتعب من التفكير تترحم على ايام عدم التفكير !!!!!!!!
هي بقت كده يعني
انا مش بقول ان من اول تجربة هننجح و هنبقى زي اروربا انما اول تجربة فشلنا او نجحنا هنتعلم
و التعليم ده اول الخطوات علشان ننجح
ولا عايزين نقوم فجأة نلاقي نفسنا عباقرة علشان مصريين و 7000 سنة حضارة
مش دايما هنستنى الي يسقينا و يدينا الحل بالمعلقة
و مع ذلك في ناس ساعدت علشان نفهم الاوضاع و جابولكم المرشحين و فهموكو خطط الاحزاب
و برامجهم الانتخابية
الناس دي تعبت علشان انتو تفكرو ده اقصى مجهود مطلوب منكو فكرو مش اكتر
و انزل انتخب مش علشان محتار تقعد في بيتك و تتخيل المأسي الي هتكون البلد عليها و انت يمين يمين شمال شمال
مفيش عصاية عبودية
مفيش ديكتاتور
مفيش حد دايم غير سبحانه و تعالى
انت انسان ليك عقل فكر بيه محدش هيفكرلك محدش هيقرر ليك محدش ليه وصايه عليك غير دينك و ضميرك.
تابع الشرقية توداي على جوجل نيوز 
كلام حضرتك صح ولكن احنا خارجين من اكثر من 3 عقود فساد وظلم واستبداد وبالتالى لسه الناس عندها احساس انها هتمشى على شكل واسلوب اللى الحاكم هيفرضه عليها وده زى ما حضرتك ذكرتى فى المقال الفكر اللى عند الناس وده نابع ايضا ” محدش يزعل ” من قلة وعى وجهل الناس وللنظر لتونس ونرى الاخبار الواردة من تونس ونشوف وجهة نظر الشعب ازاى اولا معدل الثقافة وليس التعليم فقط فى تونس مرتفعة عندهم فم يعنى ايه ديمقراطية ولايوجد لديهم فزع من فكرة حكم اسلامى او ليبرالى او غيرهم متاكدين ان اى حد هيقضى مدته ولو الناس لم تنتخبه فى المرة القادمة سيرحل ويترك الحكم ولكن للاسف عندنا لسه العقلية غير واعية بالشكل الكافى بحيث اننا نقدر نقهم الناس ان دى لن تكون اخر انتخابات فى حياتهم وان مصر بدات عصر الديمقراطية يعنى الحاكم خادم للشعب مش فارض وصاية على الشعب وان الشعب هو اللى بيشكل اسلوب وطريقة الحاكم وليس العكس واعتقد قراء التاريخ المصرى يعلمون اننا صنعنا من حكامنا فراعين وديكتاتوريين واننا اسقطنا الفرعنة والديكتاتورية مع مبارك ” اسف على الاطالة