مقالات القراء | بسمة عبدالباسط تكتب : اكسر للبنت ضلع مش هيطلع لها غيره

اكسر للبنت ضلع يطلع لها 24

مثل قديم كلنا عارفينه وسمعناه كتير وكتير، اتربوا عليه – وبيه وفيه – ناس ما زالت لحد دلوقتي مقتنعة بيه جدًّا وبتطبقه.

ولكن إيه معنى المثل ده؟ وإيه وجهة نظر الناس فيه بالظبط؟

فيه فئة معينة بتطبق المثل ده حرفيًّا؛ بمعنى إنهم فعلًا بيكسروا للبنت مش ضلع واحد.. لا.. مليون.. اتنين مليون.. كده.. وبيبقى مبدأ الضرب هو الأساس في تعاملهم، كأنها مثلًا كائن بلا عقل ولا شعور، ومفيش وسيلة للتعامل معاها غير الضرب!!

فئة تانية ما بتضربش، ولكن كلامها وطريقة تعاملها بيبقى أبشع من الضرب مليون مرة..

وكتير قوي لما تتولد البنت، وأول ما تبدأ تكبر شوية، ويلاحظ الناس أن أهلها بيعاملوها حلو – زي أي بني آدم – يكتر الكلام اللي من نوعية:

– اكسر للبنت ضلع يطلع لها 24.

– يا شيخ بلاش دلع هتبوظها كده.

– البنت ما ينفعش معاها غير الشدة.

– ما تطاوعهاش كده هتخلِّي عيارها يفلت.

وملايين من الكلمات الغريبة، واللي نفسي أعرف الناس جابتها منين، وعلى أي أساس بيشوفوا إن البنت لازم تتعامل بالشدة والقسوة علشان تبقى كويسة.

وبصراحة أحب أصدمكم جدًّا وأقول ليكم أن القسوة والشدة دي – وما يصاحبها أحيانًا من ضرب في بعض الفئات – بتخلق عقد وكلاكيع جوَّا البنت، ودي أول حاجة.

تاني حاجة بتخليها ساعات وغصب عنها تعمل حاجات غلط من ورا أهلها.

ثالث حاجة الجرح النفسي اللي بيبقى جواها من المعاملة دي بيفضل ملازمها سنين وسنين، وممكن ما ينتهيش خالص مهما حصل، وممكن يمتد بعد كده لولادها؛ بمعنى العقد اللي جواها بتطلع عليهم، يعني للأسف المشكلة مش متوقفة عليها هيَّ وبس، ولكن على أجيال هتيجي بعدها وهتتورث العقد دي.

يعني في النهاية.. اكسر للبنت ضلع مش هيطلع لها غيره، وهيموِّت كل حاجة حلوة جواها..

وفعلا لو عايز تخسر أي واحدة عاملها بشدة، وأكسر لها مليون ضلع، وصدقني أنت اللي هتجني ثمار ده بإيديك، سواء كانت الواحدة دي بنتك ولا أختك ولا خطيبتك ولا مراتك

بقلم بسمة عبدالباسط

تابع الشرقية توداي على جوجل نيوز