نظرا لتعدد حالات الاختطاف وفى ظل الظروف الحاليه يرجى عمل الاتى
1-متركبيش تاكسى لوحدك ابدا ولا الصبح ولا بليل لاى ظرف
2-المكروباصات متركبهاش وتكون فاضيه او كلها رجاله لان حصل اختطاف من مكروباصات وكانت ماشيه فالخط لكن الركاب كانو تبع السواق
………3-متمشيش لوحدك فالشوارع الجانبيه سواء الصبح او بليل..وطبعا الشوارع الخاليه من الماره ابعدى عنها تماماااااا
4-رجاء رجاء رجاء مش هقولك عشان خاطر ربنا بس هقولك عشان خاطر نفسك انتى مش حد تانى اتخلى شويه عن اللبس الضيق واى حاجه تظهر او تبرز حاجه من جسمك…معلش استحملى شويه وتعالى على نفسك الفتره دى
5-البنات اللى بتروح دروس او كورسات بليل حصل حالات اختطاف من هناك ياريت لو ابتدائى او اعدادى او حتى ثانوى حد يوصلها ويروح معاها من اهل بيتها
6-حاجه مهمه جدااا بقى لازم تتعمل..لازم كل واحده تكون حاطه معاها حاجه فشنطتها حمايه ليها(صاعق كهربائى-اسبراى اللى بيتحط فيه الشطه-لو مش عارفه تشتريه اعمليه انتى فالبيت اشترى ازازه برفان بتاعت التركيب من اى محل واعملى انتى المكونات وتكون طبعا حاميه جداا-لو مش عارفه تشترى او تعملى حاجه من الحاجات دى ولو وصل الامر حطى اى اسبريه من الحاجات بتاعت الحشرات والله مش بهزر لان التركيبه بتاعتها مؤثره برده-اى وسيله لازم تبقى معاكى فالشنطه)
وتكونى مستعده فاى وقت وفاى لحظه ومتخافيش محدش هيفتشك ولا هيقولك افتحى شنطتك
7-بالنسبه للتاكسيات تانى متركبيش مع تاكسى ويكون فيه واحده راكبه معاه لانها فالغالب بتكون تبعه
8-الناس اللى بتسافر سواء رجاله او ستات بقى حصل ان بيلاقو عالطريق حد مرمى قدامهم فبينزلو يشوفوه وفجاه يتلاقو ناس طلعت من الجنب ياريت تخلى بالكو كويس اوى
9-اخيرا طبعا النصايح العاديه محدش يقولك شيلى دى او ساعدينى فدى او تعالى
امسكيلى حاجه الخ الخ الخ
ربنا يحميكو يارب ويحفظكو من اى شر واى سوء
واللى عنده اى نصيحه تانيه ياريت تقولوها
ياريت تنشروها
ضرورى
مي نيازي محمد
تابع الشرقية توداي على جوجل نيوز 
يامى مفيش اى حاجة من الكلام ده ولو حصل تبقى حالة او اتنين وده ممكن يحصل فى الظروف العادية فمفيش داعى نخوف الناس وخلو الناس تعيش بدون رعب وقلق لان الكلام ده بيثير القلق والخوف وبيضغط على الناس اكتر مما هما مضغوطين
ميرسى كتير للنصايح دى
وربنا يسترها معايا ومع كل بنوته ويبعد عننا كل شر
عندك حق يا اسلام فى كلامك
الحياة ماشية عادية ومفيش قلق ورعب كبير لدرجة دى والله حرام ترعبى الناس بالشكل دا وكلنا لينا اخوات بنات لو عارفين ان فى خطر كبير او بالشكل الفظيع دا كنا هنقول الكلام دا قبلك
لكن بجد الكلام دا مبالغ فيه جدا .. ياريت فعلا بلاش تضغطوا على ناس وتحسسيهم بعدم آمان كده والحياة اصلا ماشية طبيعية والحذر دا بيكون فى كل وقت لكن بلاش مبالغة ورعب للناس