بالفيديو.. انهيار الفنان أحمد عزمي من البكاء بسبب صلاح عبد الله.. وتفاصيل صعبة وراء ابتعاده عن التمثيل

انهيار الفنان أحمد عزمي من البكاء بسبب صلاح عبد الله

انهار الفنان أحمد عزمي من البكاء أثناء حديثه مع الفنان الفنان صلاح عبد الله، عندما قال له الأخير: “واحشني يا ابني” ليرد عليه عزمي باكيًا: “حبيبي.. واحشني يا عم صلاح.. أنا مكسوف منك”.

ليرد عليه الفنان صلاح عبد الله خلال مداخلة هاتفية في برنامج كلام الناس المذاع على قناة “mbc مصر” تقديم الإعلامية ياسمين عز، الخميس، قائلًا: “أوعى تقول كده.. ده انت ابني وحبيبي.. وانت عارف عملت دور ابني كذا مرة، وفي الحياة انت عارف كنت بحبك أد إيه”.

فرد عليه الفنان أحمد عزمي: “أنا عارف غلاوتي عندك والله.. انت واحشني أوي أوي يا عم صلاح” وأضاف “عبد الله”: “والله رغم إني كنت في ظرف صعب، بس لما قالولي أحمد عزمي قولتلهم لا هطلع معاكم”.

وتابع الفنان صلاح عبد الله: “اللوك الجديد ده حلو أوي، مع شوية الشعر الأبيض ده حاجة جميلة جدًا، بس هيكون صعوبته لما ترجع تمثل زي زمان وتعمل عمل واتنين وتلاتة مهمين مع بعض هيبقا صعوبته في الراكور”.

وأضاف: “انت من الفنانين الجامدين أوي.. أنا عندي ثقة فيك كفنان قوي وجامد.. ربنا يكرم واشوفك أحمد عزمي بتاع زمان”.

وعن علاقته بالفنان صلاح عبد الله، قال “عزمي”: “عم صلاح عبد الله أستاذي وأبويا واتعلمت منه كتير،، وممتع في الشغل وومتع في الحياة، وممتع في انك بس تقعدي جنبه وتسمعي له”.

وروى الفنان أحمد عزمي خلال الحلقة، قصة إنهاء حياة شقيقه الأصغر المؤلمة، والتي تسببت في سفره إلى شرم الشيخ، وفقدانه للتوازن والتعرف على أشخاص مختلفين كانوا السبب في الاتجاه لشرب الكحول وغيرها من المواد التي تذهب العقل، وأردف أنه دخل في نوبة من الاكتئاب بسبب ما حدث لشقيقه، وازداد الأمر تعقيدًا بعدما طلبت منه زوجته الخلع.

وقال: “أنا في 2013 اتمسكت في شرم الشيخ بمواد مخدرة، واتعملي قضية وخدت حكم 6 شهور، وقضيت العقوبة، وخرجت على مصر وهي بتتولد من جديد”.

وأضاف “عزمي”: “أنا بعد ما خرجت حسيت بكسوف وده يمكن أكد للناس إن أحمد خلاص بقى محبط، بس الحقيقة إني كنت مكسوف وحاسس إني عامل عمله، وناس كتير من أساتذتي كانوا شايفين إن أحمد عنده حاجة حلوة وبتكبر، لما كل ده حصل بقيت مكسوف أكلم أي حد حتى عم صلاح عبد الله”.

وتابع: “أنا بعد الخروج ناويت من جوايا إني هبدأ صفحة جديدة، وهبتدي حياتي بشكل مختلف خالص، والحمد لله اتجوزت تاني واستقريت وبدأت أفكر في حياتي، وكانت المفاجأة الأولى لما أستاذ وحيد حامد بعتلي علشان فيلم الجماعة الجزء التاني، وبعدها عملت مسلسل الشارع اللي ورانا مع الأستاذ مجدي الهواري”.

شاهد بالفيديو.. انهيار الفنان أحمد عزمي من البكاء بسبب صلاح عبد الله.. وتفاصيل صعبة وراء ابتعاده عن التمثيل

تابع الشرقية توداي على جوجل نيوز