تتعالى الاصوات المناديه بعوده الشرطه الى مواقعها وتأديه واجبها حتى يعم الامن والامان ربوع المحروسه , المحروسه وعارفينها طيب الشرطه دى ايه ظروفها .
تعالوا نقيم ضباط الشرطه وقدراتهم واسباب التحاقهم بكليه الشرطه:
منذ حوالى عشرين سنه لو بصيت حواليك تشوف مين همه طلبه كليه الشرطه تلاقيهم كالتالى , ابن و ابن اخت واخو عضو مجلس الشعب والتانى ابن وخلافه لواء شرطه والتالت ابن عين من اعيان الاقاليم اللى يقدر يدفع ميه او ميه وخمسين الف جنيه لفلان الفلانى علشان ابنه يدخل كليه الشرطه وعلشان ما نعممش كلامنا كان فى حوالى عشره فى الميه من الناس العاديين علشان يخزوا الشيطان مش اكتر وبرضه عنده واسطه
علشان ايه بقى الناس دى اصرت علشان ولادهم يدخلوا كليه الشرطه؟ ايوه ليه بقى ؟ علشان يبقى باشا وفى الرايحه والجايه سيادك وفخامتك وخلافه وزيد على ذلك علشان العيله كلها تمشى فى حما الباشا حتى لو واحد صايع فى العيله يقولك انت ما تعرفش انا مين علشان ابن خاله عمه ابوه ضابط شرطه ويا سعده لو كان فى امن الدوله ولكن عضو مجلس الشعب فكره مختلف ازاى ؟ علشان يبقى المحروس امتداد لهيبه العائله وتعيش فى حصانه مخلده وهكذا يعنى ماحدش دخل الشرطه بنيه امن الوطن والحفاظ على المحروسه والكلام الفارغ ده
لو ربنا اسعدك ودخلت فى حوار مع باشا من البشاوات اول حاجه هو ما عندوش استعداد انه يسمعك اصلا لانك حمار مش فاهم حاجه ويقولك اسمع يابنى حتى لو اصغر منك ويقعد يقولك الداخليه دى عامله زى مش عارف ايه والحاسه الامنيه دى مدرك ايه و اوباما ده طلح حمار ويقعد يفتى ويألف وكل اللى عليك انك تهز راسك بالموافقه على الدرر اللى الباشا انعم عليك وهايقولهالك واصطفاك من بين بنى البقر التانيين
عاوز اسأل سؤال ؟ كام واحد عربيته اتسرقت وعمل بلاغ وروح نام فى بيتهم ولقى القسم بيتصل تعالى استلم عربيتك احنا قبضنا على الحرامى , ولكن سيادك روح دور عليها ولما تلاقيها بلغنا علشان نقفل المحضر وابقى قابلنى , فى مره اتخطفت شنطه المدام فى الشارع روحنا عملنا فيها ان احنا فى دوله امن وامان عملنا محضر فى القسم وخلافه وكتبنا رقم موديل الموبايل وقابلت ضابط مباحث اعرفه وقللى ما تقلقش روح وكل حاجه هاتبقى تمام المهم بعد اسبوع لقيت القسم بيتصل وتعالى علشان مسكنا الحرامى والموبايل رجع ,.حمامه على القسم دخلت غرفه المضبوطات الصول المختص طلع الموبايلات وبابتسامه عارف طبعا معناها قاللى حمد الله على سلامه رجوع الموبايل وراح مناولنى الموبايل فالعبد لله اتصدم الموبايل ده مش بتاعى راح اخينا ظاغرلى حته ظغره وقاللى ازاى مش بتاعك بص كويس قلتله ياعم انا كان معايا السيريال نمبر بتاع الموبايل ومش هوه ده قاللى السيريال ايه ولامؤاخزه و راح ناتشه من ايدى وقاللى اطلع فوق بقى للباشا فى المباحث طبعا الباشا كان عارفنى وقابلنى بابتسامه المنتصر اللى فتح عكا وقاللى ابسط ياعم جيبنالك الموبايل , طبعا انا مش عاوز اصدم الباشا فهمست ان الموبايل هوه بتاعى بس السيريال نمبر مختلف شويه يعنى مش كتير راح الباشا واقف واخدنى على انفراد وقاللى هو مش نفس الموديل قلت ايوه قللى خلاص علشان نقفل المحضر قلتله طيب افرض صاحب الموبايل ده قفشنى ابقى حرامى موبايلات قاللى يعنى هايقابلك فين فى وسط الملايين دى قلت صحيح ده حتى ابقى نحس واستاهل انه يتهمنى وقفلت المحضر وطبعا ما تسألش على الفلوس اللى كانت مع الموبايل .
طيب مؤهلات معظم البشوات ايه ؟ طبعا ثانويه عامه مجموع نص كم وماله هانظبطه فى كليه الشرطه هايدرس شويه علوم قانون على شويه خناقات اللى بيسموها اشتباك والباقى كيف تحط رجل على رجل قدام الناس ؟ وتحط رجلك على الطرابيزه فى وش اللى اكبر منك من غير ما تتكسف ولا حاجه على ازاى تمشى بعربيتك من غير رخصه ولا نمر غير الفاميه وخلافه ليه ؟ لأنك فوق الناس والقانون
طيب هانشتغل ازاى ونقفش الحراميه وتجار المخدرات ازاى والخارجين على القانون ؟ مالكش دعوه احنا ها نحصنك بأمن الدوله على شويه مرشدين على شويه بلطجيه كله هايظبط , يعنى لو حد لسانه طويل او عنده حتى مسدس صوت او بيروح يصلى امن الدوله ها تتعامل معاه يعنى مش ها يوصلك اصلا ………الحمد لله طيب والحراميه والمخدرات سهله اوى الحراميه فى اى بلاغ يتقدملك خلى صاحب البلاغ يقولك على اى حد يشتبه فيه بس يكون غلبان وهاته ارقعه الطريحه المتينه على النعمه هايقول انا اللى سرقت من غير ما يعرف ايه اللى اتسرق اصلا , بالنسبه للمخدرات اعمل علاقه مع التجار الكبار واعمل معاهم اتفاق ( دييل يعنى ) انهم كل فتره يرشدوك عن مغفل عاوز يدخل الكار جديد وبادىء مشروعه بكام باكتته بانجو على قرشين حشيش يعنى حاجه على الضيق كده وربنا يوسع عليه
طيب دلوقتى وبعد ما وقع امن الدوله وبعد ما البلطجيه وتجار المخدرات ما عادوش محتاجين الباشا فى حاجه لأنهم بيعملوا اللى هما عاوزينه الباشا لقى نفسه فى وضع حرج جدا لقى نفسه ممكن ينضرب عليه نار وهو رايح يقبض على متهم , يانهار اسود ينضرب على نار ماخدناهاش دى ؟هى دى الحقيقه ياحضرات ان الباشا عمره ما حلم ان فى حد ممكن يستجرى يضرب عليه نار وطبعا مع بعض الدعم من العائله زى خلى بالك من نفسك ياحبيبى منعول ابو البلد الى تمسك وفداك مصر كلها والمصيبه ان الباشا مش ناقص رعب وهى دى الحقيقه ان الساده الضباط ما اتفقوش على كده يعنى وهما داخلين الكليه ماحدش قالهم ان ممكن دا يحصل
رفقا بالشرطه فهى لم تصمم للعمل فى مثل هذه الاجواء فهم معذورون فعلا
ملحوظه : اكيد اى ضابط شرطه هايقرا الكلام ده مش ها يقول غير جمله واحده ( منعول ابو الثوره اللى خلت كلب زيك يقول الكلام ده ) ماشى يا عم ربنا يسامحك
مهندس عمرو اسعد
تابع الشرقية توداي على جوجل نيوز 
بمناسبة ان الموقع ده تابع للشرقية… فيه سؤال للأمن ..
انتم كنتم فين يوم الجمعة كنتم فى اجازة كلكم ومرة واحدة .. حسبى الله ونعم الوكيل فيكم تسيبوا البلد(الزقازيق ) مفيهاش عسكرى مرور حتى ليه ليه ليه .. اتقوا الله شوية