أعلنت المذيعة لينا شاكر عن إصابتها بمرض السرطان، وذلك بعد بدء رحلة العلاج الكيماوي منذ 8 أشهر تقريبًا.
وقالت لينا من خلال منشور لها على حسابها الرسمي على موقع التواصل الاجتماعي فيسبوك:
بالصدفه حسيت إن في حتة بلية كده في جسمي وفورًا روحت أشوف إيه دي ومن هنا ابتديت الرحلة، عملت الفحوصات والتحاليل واتشخصت وعملت العملية وأخدت الكيماوي وبعدها الإشعاعي.
وتابعت لينا: الحقيقة أني ماخدتش الخبر ده زي بقية الناس.. ولكن جالي لحظه انهيار وأنا بعمل المموجرام وماكنتش لسه اتشخصت بس لأني كنت بدعي ربنا أنه ياخدني وأنا على رجلي وفي صحتي وكنت متصورة أنه هيكتبهالي، بس في اللحظة دي زعلت لأني ابتديت أحس أنا داخلة علي إيه.
واستكملت: أنا كنت بقول أكيد هيجيلي كانسر زي ماما بس ما تخيلتش أنه يكون بدري كده وأنا عندي 43 سنة وعرفت بنفسي الإحساس ودوقت جلسات الكيماوي والإشعاعي كمان..
كله هيعدي إن شاء الله، والمهم إن أي حد عنده المعركة دي يحاول يرفع من روحه المعنوية، أنا في الأول حبيت إن الموضوع ما يتعرفش وما قولتش لناس كتير من صحابي وأهلي عشان ماكنتش عايزة حد يزعل أو يقلق أو حتى يشيل هم الخبر ده أو يبصلي بنظرة حزن.
وأضافت: بعد الـ 8 شهور اللي فاتوا خلاص دلوقتي أنا جاهزة أني أقول للدنيا كلها مش عشان مستنية حاجة، بس عشان حاجة واحدة، وهي أني أكون مصدر قوة أو إلهام وإني أقول لكل الناس إن دي مش نهاية الدنيا وإن عادي ده مرض زي أي مرض..
هنا لازم أشكر كل اللي ساندوني من أهلي وأصحابي وزملائي اللي أدوني سبب أني أكون قوية بحبهم وجدعنتهم، ومش هعرف أكتب أساميكم لأنكم كتير بس حقيقي ادتوني سبب إني أكون قوية بلمتكم حواليا.
واختتمت منشورها قائلة:
أنا عارفة انها صفحة وهقلبها وأكون مستعدة لقضاءك يارب وراضية الحمد لله، أنا بكتب الكلام ده وأنا خلصت خلاص والحمدلله عدت واللي جاي أحسن، أما بقى حكمته فأنا لسه معرفتهاش بس أكيد هعرفها وحياتي هتتغير.. أنا عشت مع أمي الله يرحمها تجربه الكانسر بكل حذافيرها وتفاصيلها من يوم اما اتشخصت ليوم وفاتها كانوا 11 سنه ونصف.
فيما أعلن عدد كبير من الاعلاميين ومتابعين لينا شاكر عن كامل دعمهم لها، وذلك من خلال نشر صورها والدعاء لها على مواقع التواصل الاجتماعي المختلفة.
وكان من أبرز الداعمين لها، هو الإعلامي شريف مدكور، الذي نشر صورتها وعلق عليها قائلاً:
ألف ألف سلامه يا صديقة عمري انتي أقوى من السرطان..
تابع الشرقية توداي على جوجل نيوز 
