رد الدكتور حسام موافي، أستاذ طب الحالات الحرجة بقصر العيني، على استشارة طبية أرسلتها له سيدة، قالت فبها: “أنا عندي 67 سنة، وباخد علاج سيولة وعندي ضغط ورجلي وارمة خاصة اليمين، والأطراف تحت الأظافر إيدي ورجلي وجع جامد، ودايما الضغط عالي، وأنا مش قادرة أمشي أنا جسمي واقف من سنين، ومش بخس أبدا، أعمل إيه؟”.
الدكتور حسام موافي يقدم نصائح ذهبية لعلاج الضغط
وقال حسام موافي خلال تقديم برنامج “ربي زدني علمًا” المذاع على قناة “صدى البلد”، الجمعة: “سنك 67 سنة وضغطك مش متظبط يبقى يا العيب في العلاج يا العيب فيكي، لأن ناس كتير جدا فاكرين إن العلاج روشتة، لكن العلاج ده تعليمات لازم تمشي عليها”.
وأضاف: “مريض السكر لازم تمشي كل يوم، وتمشي بشكل سريع، مع نظام أكل وأدوية”.
واستكمل “موافي“: “لو خدت أدوية بس عمرك ما هتخف، لازم مريض الضغط يكون في ارتياح نفسي شديد، وطول ما انت متوترة الضغط عمره ما هيتظبط، وكمان ممنوع الملح في الأكل خالص”.
وأردف: “قد يكون الدواء مش مؤثر وعايز يتغير، إنما قد يكون واحد طول النهار متوتر وعنده ضغط وعايز يخف، ده ملوش علاج، والدكتور عليه كتابة علاج للتوتر، أحسن ما يحصل للمريض مشاكل ومضاعفات من الضغط، كمان الملح هو العدو الأول والأخير لمرضى الضغط”.
وتابع: “الملح موجود في الجبن والمعلبات والأكل من خارج البيت، والمياه الغازية، وملح الطعام، كل الحاجات دي ممنوعة، أيوه الأكل هيكون ملوش طعم من غير ملح، لكن أيهما أجمل الصحة ولا الأكل؟”.
واختتم “موافي” حديثه بنصيحة، وقال فيها: “الأكل بيقعد في الفم أد إيه 10 ثواني؟ بعد ما بنزل في البطن بتحسي بطعمه؟ فهل هضيع عمري وصحتي علشان 10 ثواني، أبقى مش عاقل، لازم نشوف العيب فين، هل في الدواء ولا في الشخص نفسه ؟ بلاش توتر ونقرب لربنا شوية هنلاقي التوتر قل جدا”.
تابع الشرقية توداي على جوجل نيوز 
