هل تعلم ما هو المعنى الحقيقي لمصطلح ش . ك .ع هل هو يعنى شرقاوى كورك عظيم ، ام المعنى الصحيح هو أن ش . ك . ع يعنى شرقاوى كريم عظيم ؟.
طبعا كل أهالي محافظة الشرقية مش بيسمعوا المصطلح ده غير لما حد منهم يخرج خارج المحافظة ، مثلا لما حضرتك التنسيق بتاعك يدخلك إعلام جامعة القاهرة أو طب المنصورة أو حتى تجارة الإسكندرية مثلا يعنى، أو لما حضرتك تروح الجيش بالتأكيد لازم تسمع المصطلح ده ، وقتها هتبدا حضرتك تحلل وتتناقش وممكن تتخانق مع الزملاء في الكتيبة وتسمعهم يقولوا ش. ك. ع يعنى شرقاوى كورك عبيط .. ونت تقول لآ يا دفعه المعنى الحقيقى أنها ش . يعنى شرقاوي ، ك . يعنى كريم ، ع . يعنى عظيم وعشان تقنعهم اكتر أكيد هتحكلهم قصة القطر، إن كان في مره قطر ماشى في رمضان، وبعدين القطر عطل، وبعدين وقت الفطار، وبعدين الناس طلعوا الصوانى عليها الآكل واء واء واء … والموضوع ده بالنسبة ليك ولهم كآن تاريخ الشرقية كله انحصر في .. ش. ك .ع .
لكن الحقيقة اللى لازم حضرتكم تعرفها جيدا هو انك لازم تعرف تاريخ الشرقية كويس عشان تكون سفير لبلدك لما تخرج بره .. وتعرف الناس إن الشرقية لها تاريخ عريق لأنها كانت عاصمة مصر منذ « 4000 » سنه قبل الميلاد في الأسرة ال 21 وكان مقر الحكم هو مدينة « تانيس » اللى هيا مدينة « صان الحجر » الان .
كمان تعرف الناس ان الشرقية موجود فيها أول مسجد في مصر وافريقيا وهى مسجد « سادات قريش » بمدينة بلبيس الذي تم بنائه في الفتح الاسلامى لمصر بعد استقبال اهلى الشرقية للفتح الاسلامى .
كمان مدينة بلبيس ذكرت في التوراة باسم « جاشان » ، وذكرت أيضا في القران حينما قال الله تعالى (واسأل القرية التي كنا فيها والعير التي أقبلنا فيها وإنا لصادقون) حيمنا اتى نبى الله « يعقوب » لمقابلة سيدنا « يوسف » الذي كان يحكم مصر من مدينة جاشان ( بلبيس ) ، وأيضا ولد في الشرقية بني الله موسى الذى ألقته أمه في اليم والذى يذكر ألان انها ترعة السماعنه الموجوده بمركز « أبو حماد » وبعدها ألتقطه فرعون من فرع النيل التانسى بمدينة صان الحجر ألان.
وكانت أيضا الشرقية هى البوابة الشرقية لمصر وستقبلت العديد من الأنبياء مثل سيدنا عيسى والسيدة مريم في اول رحلتهم إلى مصر ، وقدمت الشرقية الضيافة والكرم وأيضا الحماية إلى مصر كلها على مر العصور .
كمان لازم تعرفهم إن الشرقية غيرات التاريخ والثقافة في مصر كلها ، وذلك على مر العصور ومنها مثلا .. أول من نادى بالحرية والديمقراطية الحقيقة والمطالبه بحقوق الفلاحين في مصر أثناء ثورة عرابي بقيادة الزعيم « احمد عرابي » ابن قريه هريه رزنة بمحافظة الشرقية عام 1881 .
وعرفهم كمان إن الشرقية خرجت طلعت حرب العالم الاقتصادي ، الدكتور مجدى يعقوب الجراح العالمى ، الدكتور فاروق الباز عالم الجيولوجيا ، الشاعر مرسى جميل عزيز ، عبد الحليم حافظ ، رشدى أباظة ، احمد ذكى ، عمرو دياب ، وغيرهم من عمالقة الفن والابداع، والعلماء الذين أضافوا لمصر واللعالم الكثير والكثير .
جارى العزيز لابد أن تفخر انك من أبناء هذه المحافظة العامرة بالتاريخ والتراث والحضارة والفكر والثقافة ، لابد أن تقرءا الكثير والكثير عن تاريخ محافظة الشرقية لكى لا ينحصر الفكر والتاريخ بينك وبين المغيبون عن تاريخ هذه المحافظة ما بين الـــ… ش .ك .ع .
مقالات الرأي تعبر عن صاحبها ولا تعبر بالضرورة عن رأي الشرقية توداي
تابع الشرقية توداي على جوجل نيوز 
