ناس كتير عندها امتحانات وممكن تكون دلوقتى حاسة بملل من المذاكرة ومضايقة ومخنوقة وعاوزة تهرب من الناس كلها .
ـ عايز تعرف ازاى متملش من المذاكرة
– مهم انك تكون بتذاكر علشان حاجة عاوزة توصل ليها ،تقدير مثلا او ان النجاح ده هيفرق معاك بعد التخرج او لانه هدف من اهدافك عاوز تحققه ، او مثلا علشان تفرح بابا وماما او عاوز تفرح حد قريب ليك اوى .
-مهم تكون عارف ان بتذاكر ليه لان اللى بيعمل حاجة ميعرفش بيعملها ليه بيزهق بسرعة ويمل منها .
– مهم تكون المذاكرة علشان تستفاد منها ، لانك لو بتذاكر علشان الامتحان ده فى حد ذاته ممكن يوترك ويتعب اعصابك ذاكر بهدف الاستفادة هتنجز اسرع وافضل.
– متزهقش لو حسيت انك مش فاكر اللى ذاكرته بطل تفكر فى النقطة دى لانها بتأخذ جزء كبير من مجهودك الذهنى هو الموضوع بس بيبقى محتاج مراجعة بسيطة منك وهتفتكر كل حاجة تقولى ما انا براجع مش فاكر ، ما لان حضرتك مركز على انك هتنسى فـ ده بيقلل من الطاقة اللى جواك .
– كتير من الناس لما يحب يبدأ يذاكر يقولك ابدأ بالمادة الصعبة بقى علشان اخلص منها يفتح الكتاب يفضل يبص عليه لحد ما يحس انها هى اللى بتخلص منه ، لكن الحل لما تحب تذاكر ابدأ بالحاجة اللى بتحبها وحاسس انك هتنجز فيها اكتر لان ده بيساعدك تزود من الطاقة اللى عندك يعنى من الاخر بتحس انك عملت حاجة .
– قبل ما تبدأ المذاكرة بلاش الافكار الفظيعة اللى زى ” كدا كدا مافيش فايدة ، السنه راحت اصلا ، ما انا كدا كدا مش هجيب تقدير او مجموع ” وبعد ما تخلص جرعة الاحباط تقول لنفسك يلا بقى اذاكر ياراجل ده بجد.
– متنتظرش من حد يشجعك لان ببساطة مافيش حد هيخاف على مستقبلك اكتر من نفسك .
– الكلام ده محاولة انك تبدأ تفكر فى الحل لانه موجود يمكن انا قولته بطرقتى او وجهه نظرى ، فكر انت فى طرقتك وجهة نظرك هتلاقى حلول كتير عندك صدقنى بس فكر في حل .
– فى اليوم اللى هتقعد فيه تذاكر علشان عايز تذاكر هتنجز فيه بشكل رائع عارفه ليه ؟ لانك انت اللى عايز تذاكر مش حد .
مقالات الرأي تعبر عن وجهة نظر صاحبها ولا تعبر بالضرورة عن الشرقية توداي
تابع الشرقية توداي على جوجل نيوز 
