حرص المخرج بيتر ميمي، على الرد على الانتقادات الموجهة لعدد من مشاهد “كلبش 2″، المعروض ضمن السباق الرمضاني الجاري، من أخطاء أبرزها طريقة حمل بطل العمل الفنان أمير كرارة للسلاح.
وكتب بيتر رسالة مطوّلة عبر حسابه الشخصي على “فيسبوك”، جاء فيها “أنا عادة مش برد على تعليقات لكن بقراها وباخدها باهتمام للتطور وفعلا الحمدلله وبفضله التطور موجود من عمل لآخر ومن سنة لأخرى، لكن حبيت أرد على بعض التعليقات لأن فعلا نسبة مشاهدة كلبش أصبحت فوق المتوقع لدرجة أكبر بكتير كمان من رمضان السابق”.
وتابع، موضحًا عدد من النقاد التي توقف عندها الجمهور:
1. عاكف أبو العز بيتحدث بلهجة صعيدية وأبوه بلهجة بدوية وده باين من أول حلقة (متبقاش صعيدى زي اللي خلفتك)، وهنعرف مين اللى خلفته وليه مش أبوه اللي رباه حلقة ١٥، معانا مصحح لهجة بدوي ومصحح لهجة صعيدي للدقة.
2. ضابط الأمن الوطني ممكن يكون بدقن وشعر طويل عادى جدا، وأنا راجعت ده بنفسي قبل التصوير من بعض الضباط وقيادات الداخلية واحنا بناخد التصاريح للتصوير في أماكن حقيقية وحية مثل سجن طرة ومستشفى الشرطة.
3. وضعية مسك الآلي ممكن تكون من الماسورة وأثناء الاشتباك ممكن تكون من الخزنة لسرعة تغيير الخزنة، وكان معانا عميد من العمليات الخاصة أثناء تصوير المشاهد ديه والراجل كان بيدي المحاضرة ديه قدامي للضباط مع العلم إن المدرعات والمركبات والجنود والضباط هم حقيقيين من العمليات الخاصة.
4. تراك جيم أوف ثرونس اللي في أول حلقة ده غلطة غير مقصودة، لأن إحنا في المونتاج بنحط تراكات عالمية وبعدين بنشيلها في الميكساج، ده بيحصل في كل الشغل، والحلقة الأولى كان فيها ١٣ تراك من جيم أوف ثرونس تم تغييرهم بموسيقى المسلسل ونسيو واحد سهوا، و بعتذر على الخطأ الغير مقصود برده لأني طلبت تغييرات في الحلقة اكتر من مرة كل شوية بعدل فيها واحنا عاملين موسيقى للمسلسل مصر كلها عارفاها من السنة اللي فاتت.
5. حلقة ٨ أنا عيدت المشهد لما روچينا قالت (عمر) بدل (حسام) سهوا والمونتير من ضيق الوقت حط الشوت الغلط سهوًا.
ووجه في نهاية رسالته الشكر للجمهور الذي يتابع المسلسل بدقة شديدة، كما وجه الشكر لفريق العمل “النجوم – الإنتاج – المونتاج – التأليف – الميكساج – الموسيقى- الديكور- مساعدين الإخراج”، مضيفًا “احنا بسببكم بنافس على أعلى مشاهدة للسنة التانية على التوالي بجزء تاني وده مبيحصلش، وكلبش 2 بما فيه من أكشن وضخامة إنتاجية هيكون ولا حاجة بالنسبة للمشروع اللي تم تحديده للعام المقبل رمضان ٢٠١٩، واللي هيكون الأضخم عربيا وبيضم مجموعة من نجوم عالميين من إنتاج شركة سينرجي إن شاء الله”.
واختتم طالبًا من الجمهور الدعاء له، لافتًا إلى محاولته وفريق العمل معه وغيره من من صنّاع الدراما تطوير الصناعة، وطلب منهم انتظار “حرب كرموز” المقرر عرضه في عيد الفطر في مصر والخليج وعدد من الدول الأوروبية “إيطاليا ولندن وألمانيا”.
“كلبش 2” تأليف باهر دويدار، بطولة أمير كرارة، هيثم أحمد زكي، روجينا، عبدالرحمن أبو زهرة، هالة فاخر، ومن إخراج بيتر ميمي، إنتاج تامر مرسي.
تابع الشرقية توداي على جوجل نيوز 
