استضافت الفنانة فيفي عبده، الجمعة، ملكة جمال المحجبات على «فيس بوك»، من خلال مسابقة دشنتها «آية» على صفحة، استقطبت من خلالها عددا هائلا من الفتيات للمشاركة فيها.
وقالت آية، مصممة الأزياء وصاحبة الفكرة، في برنامج «5 مواه» على قناة «TEN»، «فكرة الصفحة والمسابقة جاتني لما لاقيت إن ملكة الجمال لازم تكون مش محجبة، وكل بنت دايما بتبقى عندها حلم إنها تكون ملكة جمال مشاية بالتاج والوشاح، ولكن بتلاقي الحجاب عائق، وبعد ما ابتديت الفكرة لاقيت تجاوب من البنات معايا، فأنا قلت نستغل أنا والبنات أكتر حاجة بنقعد عليها وهي (فيس بوك)، فجربت وفتحت الباب، ولقينا تجاوب من البنات واتقدم للمسابقة أكثر من 150 بنت، ووصلنا في النهاية إلى ملكة جمال وهي ثريا وأخدت 7500 إعجاب، ووصيفتين».
وأضافت آية: «اتأكدنا من بروفايلات البنات اللي اتقدمت من خلال متخصصين في الإنترنت وفيس بوك، علشان نعرف مدى مصداقية المتقدمات، وبدأنا مع بعضهن جلسات تصوير».
من جانبها، قالت «ثريا»، الفائزة بملكة جمال المحجبات على «فيس بوك»: «واحدة صاحبتي كانت مقدمة فيها وعرفتني على مصور، ومن خلاله اتعرفت على آية، وكنت قلقانة في البداية لكن لما عرفت آيه لقيتها محترمة».
وتابعت «ثريا»: «كنت قلقة في البداية لأني هحط صوري الشخصية على شبكات التواصل الاجتماعي، ووالدتي كانت رافضة الموضوع، لكن بعد ما تعرفت على آية عرفت قد إيه هي محترمة وبعت لها الصور، والحمد لله كنت ضمن البنات اللي اتأهلت للنهائي».
وحول شروط المسابقة، أوضحت ملكة جمال المحجبات على «فيس بوك»، أن «أهم الشروط عدم وجود (فوتوشوب) في الصورة، وعدم إظهار شعر المحجبة، وأن استخدام مستحضرات التجميل يكون بسيط جدا».
وأشارت «آية» إلى أن «الحجاب العادي كان من أهم الشروط، ورفضنا الحجاب (سبانيش وتوربون)، وأنا كنت عايزة أنشر الحجاب بفكر معين، وأشجع كل بنت محجبة إنها تتمسك بحجابها»، مؤكدة أنها «استبعدت بعض الفتيات لأنهن قمن بارتداء الحجاب للمشاركة في المسابقة، ثم خلعن الحجاب بعد جلسات التصوير».
المصدر
تابع الشرقية توداي على جوجل نيوز 
