مصر بتحارب الإخوان علي أرضها و في ليبيا و استخباراتيا في سوريا.. مصر حليفة للسعودية اللي هي بتحارب الإخوان في مصر و ليبيا و بتدعمهم و تمولهم في سوريا.. مصر قصفت داعش في ليبيا.. و ضدهم في اي مكان بينما مصر حليفة السعودية اللي بتدعم داعش في سوريا.
مصر بقي ضد القاعدة في أي مكان و بتحاربهم في مصر و سوريا و ليبيا و مصر حليفة السعودية اللي بتدعم القاعدة في اليمن و سوريا و بتحاربها في مصر و ليبيا.
إيران حليف لسوريا زي مصر ما هي حليف لسوريا.. و ليها علاقات مع روسيا اللي هي حليف لمصر و سوريا.. بينما إيران بتهدد مصالح مصر في باب المندب و مصر واقفة لإيران هناك.. روسيا بقي بتدعم إيران و تدعم مصر سوا.. أمريكا بتتقارب مع إيران اللي هي حليفة لروسيا اللي هي عدوة أمريكا.. بس بتهدد مصالحها في اليمن…
سوريا بقي ضد داعش و النصرة و الإخوان و البلاوي دي بس معندهاش اي مانع تدعمهم ضد السعودية من باب داين تدان.. مصر بقي عملت تقارب فرنسي و بيتاجروا سوا و بتشتري سلاح من فرنسا بس ضد فرنسا في مالي لأن بوكو حرام هي ذراع لداعش.. روسيا بقي حليفة لمصر اللي و عدوة لفرنسا اللي هي حليفة مصر.
مصر بقي بتحارب الإخوان في كل مكان بس اشتراكها في عاصفة الحزم و تأكيدها علي شرعية عبد ربه منصور، يعني إنها بتدعم الإخوان في اليمن.. السعودية بقي بتستثمر في تركيا.. اللي هي عدوة لمصر.. بينما السعودية حليفة لمصر.. السودان بقي رئيسها إخواني.. بس جه المؤتمر الإقتصادي و سافر مع مصر إثيوبيا و دعم النظام المصري ضد الإخوان في مصر.. و راح يدعم عاصفة الحزم ضد الإخوان اللي هو منهم في اليمن.
قطر بقي عضو في تحالف الخليج و دولة في مجلس التعاون الخليجي و بينها و بين الخليج اتفاقيات دفاع مشترك.. بس هي ضد مصر إللي لو إنهارت تنهار معاها دول الخليج.. و بتدعم الإخوان ضد البحري و الكويت و الغمارات و بتدهم المتطرفين في السعودية.. و انضمت لعاصفة الحزم عشان تحارب اللي بتدعمهم دول في اليمن.
السعودية زمان ساندت الحوثيين ضد الجيش المصري أيام عبد الناصر و هددت المضيق.. بس النهاردة بتساعد الجيش المصري ضد الحوثيين عشان الجيش المصري يسيطر علي المضيق.
تونس بقي نص حكومتها و مجالسها النيابية مخترق إخوان.. و رئيسها السبسبي ضد الإخوان و داعش.. و رفض يحارب الإخوان و داعش في ليبيا.. تونس بقي حليفة لفرنسا اللي هي حليفة لمصر اللي بتحارب الإخوان و داعش في ليبيا.
الأردن بقي ضد داعش و النصرة.. و ضربت داعش في العراق بس مع إسقاط بشار عن طريق داعش و النصرة.. في نفس اللحظة بقي العراق مهري من داعش و النصرة و عمال يعيط من النفوذ الإيراني.
العراق عضو غير كامل في مجلس التعاون الخليجي اللي بيضرب في اليمن.و بيسعى لعضوية كاملة بس ضد الإعتداء علي النفوذ الإيراني في اليمن.. روسيا بقي في أزمة لأن السعودية ضربت لها اقتصادها عن طريق اللعب في أسعار البترول عشان توقع روسيا اللي هي حليفة مصر اللي هي حليفة السعودية ضد الإخوان في سوريا و مصر بس معاهم في اليمن… الأردن حليف لمصر.. بس عمل اتفاق مع اسرائيل لحفر قناة تضر بمصالح مصر.. اللي هي حليف الإردن و السعودية… إثيوبيا بقي اتصالحت مع مصر و اتفقوا علي الحفاظ علي حصص دول المنبع في السد اللي بتبنيه إثيوبيا بفلوس تركيا.. اللي هي عدوة لمصر.. بس حليفة للسعودية اللي عايزة تأمن مصر.. و ضد روسيا اللي عايزة تأمن مصر برضه.. و مع قطر اللي عايزة توقع مصر.. و عمل مظاهرات في البحرين.
وكل دول اجتمعو فى مؤتمر قمة فى شرم الشيخ علشان فى نهاية المؤتمر يتفقو على الا يتفقو على شىء
ولك الله يا شعب مصر وكل شعوب المنطقة ربنا وحدة اعلم بحالكم.
مقالات الرأي تعبر عن وجهة نظر صاحبها ولا تعبر بالضرورة عن الشرقية توداي
تابع الشرقية توداي على جوجل نيوز 
